काठमाडौं, जेठ ३0 – अनेरास्ववियु (अखिल नेपाल स्वतन्त्र विद्यार्थी युनियन) को केन्द्रीय महाधिवेशनमा आर्जन रिजालले अत्यधिक मत प्राप्त गर्दै केन्द्रिय सचिवालय सदस्य पदमा विजयी भएका छन्। उनले ६५१ मत ल्याउँदै लुम्बिनी प्रदेश भूगोल तर्फ बाट केन्द्रिय सचिवालय सदस्य पदमा निर्वाचित भएका हुन् ।
देशभरका प्रतिनिधिहरू सहभागी रहेको यस निर्वाचनमा आर्जन रिजालको जित विद्यार्थी राजनीतिमा उनीप्रति रहेको गहिरो विश्वास र नेतृत्व क्षमताको प्रतिविम्बको रूपमा लिइएको छ। निरन्तर विद्यार्थी हितका सवालमा उनी सक्रिय रहँदै आएका थिए, जसले गर्दा उनलाई व्यापक समर्थन प्राप्त भएको हो।
निर्वाचनपछि सञ्चारकर्मीहरूसँग प्रतिक्रिया दिँदै रिजालले भने, “यो जित केवल एक पदको जित होइन, यो परिवर्तनको पक्षमा उभिएका सम्पूर्ण विद्यार्थीहरूको जित हो। म अबको दिनमा विद्यार्थीको हक, अधिकार, न्याय र शिक्षाको गुणस्तरमा सुधार ल्याउन निरन्तर क्रियाशील रहनेछु।” आर्जन रिजाल लामो समयदेखि विद्यार्थी आन्दोलनसँग जोडिएका, इमानदार, प्रखर वक्ता र संगठित योजनाकारका रूपमा चिनिन्छन्। संगठनभित्र नेतृत्व विकास, शैक्षिक सुधार, पारदर्शिता र युवाको स्वर बुलन्द गर्ने विषयमा उनले निरन्तर पहल गरेका छन्। उनको नेतृत्वमा विभिन्न शैक्षिक संस्थानमा भएका आन्दोलन, शुल्क विरुद्धका अभियान, छात्रवृत्तिको निष्पक्ष वितरणका लागि गरिएको दबाब, र संस्थागत अनियमितता विरुद्धको संघर्ष विद्यार्थीहरूबीच उल्लेखनीय बनेको छ। त्यही कारण उनले यसपटक सबैभन्दा बढी मत ल्याउन सफल भएका हुन्।
संगठनका वरिष्ठ नेताहरूले समेत आर्जनको जितलाई नयाँ पुस्ताको नेतृत्वको उदाहरणको रूपमा लिएका छन्। अनेरास्ववियु भित्र भविष्यमा मार्गनिर्देशन गर्ने सम्भावित नेताको रूपमा उनी हेर्न थालिएको छ।
उनको यो जितले अनेरास्ववियुमा नयाँ ऊर्जा, स्पष्ट विचारधारा र जिम्मेवार नेतृत्वको संकेत गरेको विश्लेषकहरू बताउँछन्। अब विद्यार्थीहरूमा आशा पलाएको छ कि आर्जन रिजाल जस्ता युवाले संगठनलाई अझ सशक्त, प्रगतिशील र समावेशी बनाउने छन्।
Post a Comment