वान हार्ट वर्ल्ड वाइड र एभरेस्ट क्लब दैलेखको साझेदारीमा सञ्चालित स्थानीय सरकारको साझेदारीमा मातृ तथा नवजात शिशु स्वास्थ्य सेवा सुदृढीकरण परियोजनाद्वारा दैलेख जिल्लाका ६ वटा स्वास्थ्य संस्थाहरूलाई अत्यावश्यक सामग्रीहरू हस्तान्तरण गरिएको छ। प्रसुति केन्द्रका सामग्रीहरू प्राप्त गर्ने संस्था हरू भगवतीमाई गाउँपालिका अन्तर्गतको बडाभैरव स्वास्थ्य चौकी र पगनाथ स्वास्थ्य चौकी, चामुण्डा बिन्द्रासैनी नगरपालिका अन्तर्गतको चामुण्डा स्वास्थ्यचौकी र लयाटीविन्द्र सैनी स्वास्थ्य चौकी रहेका छन् । साथै, नौमुले गाउँपालिका अन्तर्गतको टोली स्वास्थ्य चौकी र महाबु गाउँपालिका अन्तर्गतको रानीवन स्वास्थ्य चौकीलाई पनि सो सामग्रीहरू हस्तान्तरण गरिएको छ ।
भौगोलिक रूपमा विकट स्थानहरूमा अवस्थित ती स्वास्थ्य संस्थाहरूमा नियमित प्रसुति सेवा प्रदान हुँदै आइरहेको तर अत्यावश्यक सामग्रीको अभावले गुणस्तरीय सेवा प्रदान गर्न कठिनाइ भएको अवस्थालाई न्यूनीकरण गर्न परियोजनाद्वारा सामग्रीहरू प्रदान गरिएको हो। स्वास्थ्य संस्थाहरूमा सञ्चालित न्यूनतम सेवा मापदण्ड कार्यक्रमको आधारमा आवश्यकता पहिचान गरी सामग्री सहयोग गरिएको छ। प्रसुति केन्द्रहरूमा दक्ष जनशक्ति हुँदाहुँदै सामग्रीको अभावका कारणले कतिपय सामान्य तथा जटिल केसहरू समयमै व्यवस्थापन गर्न नसक्दा सुत्केरी आमाहरू को ज्यान जोखिममा पर्ने समस्या हरु न्यूनीकरण हुने अपेक्षा गरिएको छ।
महाबु गाउँपालिकाका स्वास्थ्य शाखा प्रमुख रमेश दशौदीका अनुसार परियोजनाले विगतका वर्षहरूदेखि नै आवश्यकताको आधारमा अत्यावश्यक सामग्री हरू सहयोग तथा मातृ नवजात शिशु स्वास्थ्य सम्बन्धी कार्यक्रमहरू सञ्चालन गरेकोमा कृतज्ञता व्यक्त गर्दै स्थानीय सरकार मातृ तथा नवजात शिशु स्वास्थ्य सेवालाई सुदृढीकरण गर्न सदैव तत्पर रहने बताउनुभएको छ।
एभरेस्ट क्लब दैलेखका परियोजना संयोजक भावना खड्काका अनुसार प्रसुति केन्द्रको सुदृढीकरणले गर्दा दूरदराजमा बस्ने आमाहरूको स्वास्थ्य संस्थासम्मको पहुँचमा वृद्धि हुने र गुणस्तरीय सेवा पनि प्राप्त हुने हुँदा घरमै हुने प्रसुति सङ्ख्या मा कमी आउने बताउनुभएको छ।
वान हार्ट वर्ल्ड वाइडका जिल्ला संयोजक सन्तराम चौधरीका अनुसार ६ वटै स्वास्थ्य संस्थाहरूको सामग्रीको लागत मूल्य १० लाख ४८ हजार ४२२ रूपैयाँ रहेको छ। हस्तान्तरण गरिएका सामग्रीको दिगो तथा उचित प्रयोगको लागि सम्बन्धित पालिका तथा स्वास्थ्य संस्था सञ्चालन तथा व्यवस्थापन समिति र स्वास्थ्यकर्मी हरूको अहम भूमिका रहेको बताउनुभएको छ।
परियोजनाद्वारा महाबु गाउँपालिकालाई एक थान ग्रामीण भिडियो एक्सरे मेसिन पनि सहयोग गरेको छ ।
Post a Comment